Reglugerð framkvæmdastjórnarinnar (ESB) 2023/838 frá 23. mars 2023 - 32023R0838

Á ársgrundvelli tekur framkvæmdastjórn Evrópusambandsins að sér að endurskoða og uppfæra skrá yfir flugrekstraraðila sem starfrækja virka flugstarfsemi eins og tilgreind er í I. viðauka tilskipunar (ESB) 2003/87/EB. Markmið skrárinnar er að auka skilvirkni eftirlits með flugrekendum með því að úthluta einstökum aðildarríkjum sérstakar eftirlitsskyldur. Skráin er unnin úr samantekt upplýsinga sem fengin er úr nýjustu gögnum frá Eurocontrol, með sérstakri áherslu á þá flugrekstraraðila sem eru með losun yfir þeim mörkum sem tilgreind eru í framangreindri tilskipun, þ.e. annars vegar 10.000 tonn af CO2 fyrir aðila sem starfa í atvinnuskyni, og hins vegar 1.000 tonn af CO2 fyrir aðila sem ekki starfa í atvinnuskyni.Af þessu leiðir að ekki eru allir flugrekendur, sem úthlutaðir eru til aðildarríkis, háðir skyldubundinni tilkynningaskyldu á starfseminni sinni. Í reglugerð þessari eru 258 flugrekendur skráðir undir valdsvið Íslands. Aftur á móti eru aðeins u.þ.b. 10 flugrekendur sem ná framangreindum losunarviðmiðum og eru því bundnir af þeirri skyldu að tilkynna umsvif sín til Umhverfisstofnunar.Reglugerð þessi kallar ekki á efnislegar eða tæknilegar breytingar á landsrétti. Um er að ræða uppfærslu á þegar innleiddri gerð sem er einungis tæknilegs eðlis.