CSDR Refit - 32023R2845

Með reglugerðinni eru gerðar ýmsar breytingar á reglugerð Evrópuþingsins og ráðsins (ESB) nr. 909/2014 um bætt verðbréfauppgjör í Evrópusambandinu og um verðbréfamiðstöðvar o.fl., sem innleidd var hér á landi með lögum um verðbréfamiðstöðvar, uppgjör og rafræna eignarskráningu fjármálagerninga, nr. 7/2020.Breytingar varða m.a. ráðstafanir til að koma í veg fyrir og takast á við uppgjörsbresti. Verðbréfamiðstöð ber að vakta uppgjörsbresti í viðskiptum með fjármálagerninga og beita viðurlögum, þ. á m. sektum, á skilvirkan hátt. Skerpt er á reglum um sektarkerfið og ferli við skyldubundin uppgjörskaup. Framkvæmdastjórn Evrópusambandsins er falið að útfæra nánari reglur um þetta, með aðkomu Evrópsku verðbréfamarkaðseftirlitsstofnunarinnar (ESMA). Vegna ákvæðanna um skyldubundin uppgjörskaup er smávægileg breyting gerð á skortsölureglugerð (ESB) nr. 236/2012, sem innleidd var hér á landi með lögum um skortsölu og skuldatryggingar, nr. 55/2017. Lágmarkstíðni reglulegs mats á starfsemi verðbréfamiðstöðva skal miðast við þrjú ár í stað árlegrar framkvæmdar, sem þótt hefur of íþyngjandi fyrir bæði verðbréfamiðstöðvar og eftirlitsaðila. Með reglugerðinni er jafnframt skerpt á reglum sem varða  samstarf landsbundinna eftirlitsaðila við veitingu starfsleyfis og framkvæmd eftirlits og skylt verður að koma á fót samstarfshópi eftirlitsaðila fyrir verðbréfamiðstöðvar með starfsemi yfir landamæri sem talin er verulega mikilvæg fyrir starfsemi verðbréfamarkaða og vernd fjárfesta, en framkvæmdastjórninni er falið að útfæra skilyrði þess nánar í reglum.Í tengslum við breytingar sem varða veitingu þjónustu af hálfu verðbréfamiðstöðva yfir landamæri er gert ráð fyrir að aðildarríki miðli upplýsingum um landslöggjöf á sviði fyrirtækjaréttar til ESMA reglulega og a.m.k. á tveggja ára fresti.Önnur nýmæli varða m.a. áætlanir verðbréfamiðstöðva um endurbót og skipulega slitameðferð, verðbréfamiðstöðvar þriðja lands, miðlun upplýsinga og mat vegna breytinga á eignarhaldi, uppgjör peningahluta verðbréfaviðskipta og svonefnda viðbótarbankaþjónustu.Framkvæmdastjórn Evrópusambandsins er m.a. með gerðinni falin nánari reglusetning um verklag sem tekur á mögulegum hagsmunaárekstrum,  frestað uppgjör á hreinum grunni og upplýsingagjöf vegna verðbréfamiðstöðva þriðja lands. Henni er jafnframt ætlað að taka út og gera almenna skýrslu um framkvæmd reglugerðar (ESB) nr. 909/2014, með áorðnum breytingum, fyrir 17. janúar 2029.