32025L0002

Meðal breytinga má nefna að meðalhófsreglan á oftar við en áður. Skilgreind verður ný flokkun vátryggingafélaga sem teljast „smá og einföld“ en slík flokkun gerir þeim kleift að beita einfaldari útreikningum auk þess sem stjórnarháttakröfur eru takmarkaðri og skýrslugjöf umfangsminni.  Markmið tilskipunarinnar er að styrkja langtímaábyrgðarráðstafanir og draga úr sveifluaukandi áhrifum fjármálamarkaða á eiginfjárkröfur vátryggingafélaga. Leitast er við að tryggja að eiginfjárkröfur endurspegli raunverulega áhættu til lengri tíma og að þær séu ekki óhóflega viðkvæmar fyrir skammtímasveiflum fjármálamarkaða.  Vátryggingafélög skulu við eigið áhættu- og gjaldþolsmat taka tillit til þjóðhagsvarúðar og mögulegrar þróunar á fjármálamörkuðum, þ. á m. stýrivaxta og verðbólgu. Vátryggingafélög skulu setja upp áætlun til að bregðast við lausafjáráhættu og uppfæra hana reglulega.  Tilskipunin felur í sér breytingar á eftirliti með samstæðum, samvinnu eftirlitsstjórnvalda og reglum um starfsemi yfir landamæri. Heimildir eftirlitsstjórnvalda til að grípa inn í þegar áhætta safnast upp innan samstæðu eru auknar og settar eru skýrari reglur um starfsemi yfir landamæri og upplýsingagjöf um hana. Gerðar eru kröfur um aukna samvinnu og upplýsingaskipti milli eftirlitsaðila heimaríkis og gistiríkis vátryggingafélags ef starfsemi félagsins yfir landamæri telst veruleg.  Tilskipunin innleiðir sjálfbærniáhættu í áhættustýringu og stjórnarhætti. Vátryggingafélög þurfa að taka kerfisbundið tillit til loftslagsáhættu, umbreytingaráhættu og annarra sjálfbærniþátta í ákvörðunum sína og meta fjárhagslega áhættu vegna þessara þátta.  Einnig eru gerðar breytingar á skýrslugjöf og gagnsæi, þar sem dregið er úr óþarfa upplýsingagjöf án þess að draga úr gæðum eftirlits eða vernd vátryggingataka. Eftirlitsstjórnvöld hafa í vissum tilvikum heimild til að kveða á um örari eða lægri tíðni skýrsluskila ef það er talið nauðsynlegt eða tiltekin skilyrði eru uppfyllt. Eftirlitsstjórnvöld þurfa sérstaklega að meta hvort tiltekin skýrsluskil séu of íþyngjandi fyrir lítil og einföld vátryggingafélög sem og önnur félög sem ekki teljast lítil og einföld.