32022R0612

Fyrsta reglugerð Evrópusambandsins þar sem kveðið var á um hámarksverð fyrir reikiþjónustu var sett árið 2007. Fyrri og núgildandi reikireglugerðir hafa leitt til margra jákvæðra breytinga fyrir neytendur. Fyrst með sífellt lækkandi hámarksverðum á reikiþjónustu innan EES svæðisins og svo með „Roam Like at Home (RLAH)“ fyrirkomulaginu þar sem innanlandsverð gildir fyrir reikinotkun innan viðmiðunarmarka.Þær breytingar sem nú stendur til að gera eru til einföldunar á reglugerðinni og leiða annars vegar af RLAH og hins vegar af samræmdu lúkningarverði farnetssímtala.Breytingarnar eru í meginþáttum tvær:Annars vegar er felld niður kvöð um aðskilda sölu reikiþjónustu. Með þeirri kvöð voru farsímafyrirtæki skuldbundin til að bjóða reikiþjónustu sem sérstaka vöru, aðskilda frá almennri farsímaáskrift, sem neytendur gætu valið eftir hentugleika. Þannig gæti neytandi valið reikiþjónustu frá öðru fyrirtæki en því sem almenna farsímaáskriftin er fengin hjá. Með þessari kvöð var gerð tilraun til að koma á samkeppni í reikiþjónustu. Flækjustig þessa fyrirkomulags reyndist töluvert auk þess sem RLAH hefur gert slíkt framboð um aðskilda reikiþjónustu óþarfa. Með nýju reglugerðinni er þessi kvöð felld niður.Hins vegar er árlegri endurskoðun á vegnu meðalverði lúkningarverðs farnetssímtala innan Evrópusambandsins hætt þar sem samræmt lúkningarverð leysir meðalverðið af hólmi til ákvörðunar á hámarksverði á heildsölu lúkningar vegna reikis.Þessu til viðbótar verða gerðar einfaldanir á því hvernig þjóðir sem ekki nota evru sem gjaldmiðil reikna verð út frá gengi gjaldmiðla, farnetsrekendum til hægðarauka.Hér er því fyrst og fremst verið að einfalda það regluverk sem farnetsrekendur fara eftir við framkvæmd reikiþjónustu.Lagastoð fyrir innleiðingu reglugerðarinnar: Lagastoð er að finna í 35. gr. fjarskiptalaga. Mælt er með því að innleiðing verði framkvæmd með tilvísunaraðferð með breytingu á reglugerð um alþjóðlegt reiki á almennum farsímanetum innan Evrópska efnahagssvæðisins, með síðari breytingum.