32020R0411

Markmið sem að er stefnt: Markmiðið er að samræma kröfur til farþegaskipa í siglingum innan EES-svæðisins við kröfur sem gerðar eru til skipa í alþjóðasamningum. Kröfurnar sem um ræðir og verið er að breyta með þessari tilteknu gerð eru í a. lið 2. gr. tilskipunar 2009/45/EB. Í einhverjum tilvikum hafa breytingar á þeim alþjóðlegu samningum sem um ræðir ekki verið innleiddar og er það leiðrétt með reglugerð 2020/411. Viðaukar tilskipunar 2009/45 eru einfaldaðir til að auka læsileika þeirra auk þess sem gerðar eru breytingar á viðaukunum sem leiða af tilskipun (ESB) 2017/2108.
Aðdragandi: Tillagan kemur í kjölfar hæfisskoðunar Evrópusambandsins e. Regulatory fitness and performance programme eða “REFIT” á evrópskri siglingalöggjöf og samþykktar tilskipunar 2017/2108.
Samþykkt hefur verið að ál teldist svokallað „sambærilegt efni“ í skilningi tilskipunar 2009/45/EB og því er talin þörf á að skýra ákveðin atriði tæknilegra krafna.
Efnisútdráttur: Talin er þörf á að samræma tæknilegar kröfur í tilskipun 2009/45 við breytingar á tæknilegum kröfum í alþjóðasamningum. Þá eru breytingar sem gerðar hafa verið á tilskipun 2009/45/EB og settar voru fram í tilskipun (ESB) 2017/2108 teknar inn, t.a.m. kröfur til farþegaskipa undir 24 metrum að lengd.
Að lokum eru viðaukar einfaldaðir til að auka læsileika þeirra án þess að kröfum til farþegaskipa sé sérstaklega breytt. Eingöngu er um uppfærslur á viðaukum að ræða.
Umsögn: helstu breytingar, mati á umfangi, og áhrif hér á landi: Ekki er fyrirsjáanlegt að gerðin hafi í för með sér miklar breytingar hér á landi. Gerðin er til einföldunar og skýringar.
Gert var grein fyrir meginbreytingum að efninu til sem felast í þessari gerð vegna Tilskipunar (ESB) 2017/2108.
Lagastoð fyrir innleiðingu gerðar: Breytingar innleiddar í reglugerð 666/2001 eða sambærilega reglugerð setta með stoð í 4. mgr. 1. gr. laga nr. 47/2003.
Mat eða tilgreining á kostnaði hins opinbera, sveitarfélaga og atvinnulífs og almennings, ef einhver er: Samgöngustofa telur miðað við forsendur að fyrirséður kostnaður verði óverulegur eða enginn.
Skörun við starfssvið annarra ráðuneyta: Á ekki við
Tilgreining á hagsmunaaðilum: Ferðaþjónustuaðilar og aðrir sem sigla með farþega
Horizontal issues: sektir, aðrar refsingar, stofnanir, lönd utan EES: Á ekki við
Þörf fyrir EFTA-komment – aðlaganir sem þegar eru í gildi vegna undanfarandi gerða: Á ekki við.