32021R0347

Virkt klór losað úr hýpóklórsýru hefur verið metið til notkunar í sæfivörur í vöruflokkum 2, 3, 4 og 5, eins og þeir eru skilgreindir í V. viðauka við tilskipun Evrópuþingsins og ráðsins 98/8/EB, sem samsvarar vöruflokkum 2, 3, 4 og 5 í V. viðauka reglugerðar (ESB) nr. 528/2012. Slóvakía, sem lögbært matsyfirvald, skilaði matsskýrslu ásamt niðurstöðu sinni til framkvæmdastjórnarinnar þann 19. nóvember 2010.

Að teknu tilliti til niðurstöðu lögbæra matsyfirvaldsins samþykkti sæfivörunefndin álit Efnastofnunar Evrópu þann 16. júní 2020, í samræmi við 2. mgr. 7. gr. framseldrar reglugerðar (ESB) nr. 1062/2014.

Samkvæmt álitinu má vænta þess að sæfivörur í vöruflokkum 2, 3, 4 og 5 sem nota virkt klór losað úr hýpóklórsýru, uppfylli kröfurnar sem mælt er fyrir um í 5. gr. tilskipunar 98/8/EB, að því tilskildu að farið sé að tilteknum forskriftum og skilyrðum varðandi notkun þeirra.

Að teknu tilliti til álits Efnastofnunarinnar er viðeigandi að samþykkja virkt klór losað úr hýpóklórsýru sem virkt efni til notkunar í sæfivörur í vöruflokkum 2, 3, 4 og 5 að uppfylltum þeim forskriftum og skilyrðum sem koma fram í viðauka við reglugerðina.

Þær forskriftir og skilyrði eru eftirfarandi:
- Við mat á vörunni skal huga sérstaklega að váhrifum, áhættu og virkni tengdri hverri notkun sem er sótt um og er til yfirferðar í mati á markaðsleyfi, en ekki fjallað um í áhættumati virka efnisins á vettvangi Sambandsins.
- Sérstök skilyrði fyrir vöruflokk 2:
Við mat á vörunni skal huga sérstaklega að hlífðarbúnaði þegar varan er notuð í atvinnuskyni til að sótthreinsa hörð yfirborð með moppu eða þurrku.
- Sérstök skilyrði fyrir vöruflokka 3, 4 og 5:
- Fyrir vörur sem geta skilið eftir leifar í matvælum eða fóðri þarf að sannreyna hvort þörf sé á að setja ný eða breyta hámarksgildum leifa (MRL) í samræmi við reglugerð Evrópuþingsins og ráðsins (EB) nr. 470/2009 eða reglugerð Evrópuþingsins og ráðsins (EB) nr. 396/2005. Gera skal viðeigandi ráðstafanir til að milda áhættu svo að ekki verði farið yfir hámarksgildi leifa.