32006R1055

Reglugerð framkvæmdastjórnarinnar nr. 1055/2008 um innleiðingu reglugerðar þingsins og ráðsins nr. 184/2005 varðandi gerð og frágang gæðaskýrslna um greiðslujafnaðartölur.
Reglugerð 184/2005 setur fram á heildstæðan hátt ramma fyrir hagskýrslugerð um greiðslujöfnuð með hliðsjón af gildandi regluverki alþjóðastofnana eins og Alþjóðagreiðslujafnaðarsjóðsins, Sameinuðu þjóðanna og OECD. Í reglugerðinni eru sett fram í viðaukum listar yfir þau atriði sem aðildarlöndin skulu veita upplýsingar um ásamt skilgreiningum hugtaka. Í kjölfar þessarar grunnreglugerðar mátti vænta reglugerða framkvæmdastjórnarinnar til að útfæra ýmsa þætti nánar í sk. innleiðingarreglugerðum og er reglugerð 1055/2008 gefin út til að framfylgja ákvæðum í grunnreglugerð 184/2005.


Reglugerð þings og ráðs ESB nr. 1101/2008 um heimildir til að afhenda Hagstofu Evrópusambandsins (Eurostat) gögn sem trúnaðarkvaðir hvíla á. Reglugerðin er í aðalatriðum samin til að sameina á einum stað eldri reglugerðir sem varða meðferð trúnaðarupplýsinga sem Eurostat óskar eftir eða reglugerðir ESB kveða á um og snúa beiðnirnar einkum að aðildarlöndum ESB/EES. Reglugerð 1101/2008 er lögfest í stað eldri gerðar frá árinu 1990 (1588/90) sem fellur þar með úr gildi auk þess sem hreinsað er upp í síðari tíma gerðum sem varða heimildir til upplýsingaöflunar í þágu starfsemi hagstofu ESB.