32015L0719

Í tilskipun 96/53/EB eru reglur um hámarks stærðir og þyngdir ökutækja. Með tilskipun 2015/719 er tilskipun 96/53 breytt með hliðsjón af tækniframförum. Markmiðið sem að er stefnt með samþykkt tilskipunarinnar er að auka eldsneytis- og orkusparnað í landflutningum og halda jafnframt áfram að stuðla að auknu umferðaröryggi. Ákvæðum tilskipunar 96/53/EB um hámarkslengd og þyngd ökutækja er breytt á þá leið að gert er betra ráð fyrir nýjum eldsneytisgjöfum og heimilaðar undanþágur sem gera framleiðendum ökutækja kleift að nýta sér tækniframfarir til að auka „loftstreymisframmistöðu“ aeorodynamics ökutækja með það að leiðarljósi að auka öryggi og um leið orkusparnað. Helstu breytingarnar eru:
• Heimild til meiri lengdar ökutækja þegar þau eru búin búnaði til að draga úr loftmótstöðu svo sem blöðkum sem festar eru aftan á þau eða þá að framhlið þeirra sé hönnuð sérstaklega til að minka mótstöðu.
• Aukinn hvati til að nota „hreina“ orkugjafa með því að leyfa aukna hámarksþyngd slíkra ökutækja um sem nemur 1 tonni.
• Aukið svigrúm fyrir ökutæki sem flytja 45 feta gáma.
• Í ljósi aukinnar þyngdar farþega og farangurs er leyfileg hámarksþyngd hópbifreiða hækkuð um 1 tonn.
Loks skal nefna að tillagan felur í sér vissar breytingar á tilskipun 96/53/EB, sem lúta að eftirliti með ökutækjum á vegum, sbr. núverandi umferðareftirlit Samgöngustofu.
Áhrif hér á landi verða hverfandi og fyrst og fremst óbein þar sem hér eru eingöngu notuð ökutæki sem framleidd eru í öðrum löndum. Hin jákvæðu áhrif tilskipunarinnar verða þó væntanlega þau sömu vegna eldsneytissparnaðar. Rétt er að vekja athygli á að ákvæði tilskipunarinnar eru að mestu ívilnandi fyrir þá sem stunda flutninga á vegum og er ætlað að vera þeim til hagsbóta.
Áhrif og kostnaður fyrir Samgöngustofu fellur undir reglulega starfssemi en athuga þarf breytta skráningu í ökutækjaskrá vegna þess aukabúnaðar sem minnst var á. Þá er rætt um upplýsingaskipti og gerð krafa um að ríki tilnefni tengilið sem tekur við tilkynningum og kemur þeim á framfæri.