32016R0472

Í gildi er reglugerð (ESB) nr. 72/2010 um verklagsreglur við framkvæmd skoðana á vegum framkvæmdastjórnarinnar á sviði flugverndar. Eftirlitsstofnun EFTA (ESA) framkvæmir skoðanir á sviði flugverndar hjá EES EFTA ríkjunum á grundvelli EES samningsins. Markmiðið með reglugerð (ESB) nr. 2016/472 er að auka frekari samræmingu á sviði flugverndar innan EES svæðisins þannig að hugtakið skoðunarmaður framkvæmdastjórnarinnar taki einnig til viðurkenndra sérfræðinga frá aðildarríkjum EFTA sem og viðurkenndra skoðunarmanna ESA. Í sama skyni tekur hugtakið skoðunarmaður framkvæmdastjórnarinnar nú einnig til viðurkenndra sérfræðinga frá skrifstofu Evrópusambands flugmálastjórna (ECAC).
Reglugerðin kemur ekki til með að hafa áhrif hér á landi. Líkt og að framan greinir heimilar reglugerðin m.a. framkvæmdastjórninni að kalla til sérfræðinga frá ESA sem verða fullgildir meðlimir í skoðunarhópum framkvæmdastjórnarinnar en það hefur verið mikið atriði fyrir sérfræðinga ESA á sviði flugverndar sem liður í síþjálfun þeirra. Hingað til hafa sérfræðingar ESA einungis verið með skoðunarhópum framkvæmdastjórnarinnar sem áheyrnarfulltrúar. Á sama hátt getur ESA kallað til sérfræðinga frá framkvæmdastjórninni sem fullgilda meðlimi í skoðunarhópum ESA.
Fyrir viðurkennda sérfræðinga á Íslandi mun reglugerðin ekki breyta þeirri framkvæmd sem viðhöfð er í dag að framkvæmdastjórnin kallar þá reglulega til sem hluta af skoðunarhópum sínum.
Í gildi er aðlögun sem gerð var við upptöku reglugerðar (ESB) nr. 72/2010 í EES samninginn þar sem fram kemur að framkvæmdastjórnin og ESA megi bjóða skoðunarmönnum hins að taka þátt í skoðunarhópum sínum sem áheyrnarfulltrúar. Fella þarf þann aðlögunartexta úr gildi.