32016R1185

Framkvæmdarreglugerð framkvæmdastjórnarinnar nr. 923/2012 um sameiginlegar flugreglur og rekstrarákvæði vegna þjónustu og verklags í flugleiðsögu hefur einnig verið nefnd Single European Rules of the Air, SERA. Markmiðið er að samræma hvernig aðildarríki ESB uppfylla ICAO viðauka 2 auk ákveðinna ákvæða úr öðrum viðaukum og verklagi ICAO. Með því á að samræma hvernig flugi og flugleiðsöguþjónustu skuli háttað innan samevrópska loftrýmisins. Gildissvið 923/2012 er EUR og AFI svæði ICAO. Hún gildir því ekki á NAT svæðinu sem íslensk flugleiðsöguþjónusta er starfrækt á. Þess ber að geta að 923/2012 gildir um þau loftför sem flogið er til, innan og frá Evrópusambandinu beri loftförin ríkis- og skráningarfang aðildarríkis EES-svæðisins, og hafi þau flugrekstur í því loftrými að því marki sem reglurnar eru ekki í mótsögn við reglur þess ríkis hvers lögsögu er flogið um. Þannig þurfa íslenskir flugrekendur sem fljúga inn í ESB að hafa tiltekið verklag og kerfi sem passa við verklag og kerfi sem reglugerð (ESB) nr. 923/2012 með síðari breytingum, kveður á um. Sú krafa á flugrekendur kemur þó ekki inn með þessari reglugerð heldur með öðrum reglum á sviði flugrekstrar, reglugerð nr. 965/2012 sem dæmi.
Með reglugerð 2016/1185 eru gerðar breytingar á reglugerð (ESB) nr. 923/2012. Með henni eru tekin upp tiltekin ákvæði í ICAO viðaukum 2, 3, 10 og 11, auk ákvæða úr ICAO PANS-ATM. Þegar vinna hófst við gerð sameiginlegra flugreglna var frá upphafi ákveðið að verkið skyldi unnið í skrefum og var því skipt upp í A, B og C hluta. Með reglugerð (ESB) nr. 923/2012 voru A og B hlutar innleiddir og nú er komið að C hluta með reglugerð (ESB) no. 2016/1185. Með C hlutanum er lögð lokahönd á sameiginlegar flugreglur. Reglurnar verða ítarlegri, ákveðin ákvæði úr PANS-ATM sem almennt má líta á sem viðurkenndar aðferðir til að uppfylla kröfur er sett skör ofar með því að setja þau ákvæði í reglugerðina. Með C hluta er einnig verið að tryggja betra samræmi við reglugerðir (ESB) 965/2012, 139/2014 og ákvæði úr reglugerð (ESB) 730/2006 eru færð í heild sinni yfir í reglugerð 923/2012.
Þrátt fyrir að 923/2012 gildi ekki á Íslandi hafa komið fram sjónarmið þess efnis að hún væri látin gilda hér. Yrði af því þarf að skoða hvort og hvernig aðlaganir Ísland þyrfti að fá. Verði tekin sú ákvörðun að beita reglugerð (ESB) 923/2012 hér þarf að hafa í huga að C-hlutinn felur í sér ákveðin atriði sem eru á skjön við flugleiðsöguna eins og hún er rekin í dag. Meðal annars er þar krafa um flokkun loftrýmis og kröfur til sérlegs sjónflugs. Þegar ákveðið var við upptöku 923/2012 í EES-samninginn að hún yrði ekki látin gilda hér var horft til þess að yfir úthafi eru ríki skuldbundin til að beita ICAO Annex 2 án frávika og ekki var á þeim tímapunkti vilji til að vera með ólíkar flugreglur innan og utan lofthelgi Íslands, þ.e. innan íslenska flugupplýsingasvæðisins, auk þess sem Danir hafa ákveðið að beita skuli ákvæðum ICAO Annex 2 með þeim frávikum sem Danir hafa birt yfir lofthelgi Grænlands.