32016R2286

Umrædd innleiðingarreglugerð nr. 2016/2286/EB kemur í framhaldi af þeim breytingum sem gerðar voru á reikireglugerð nr. 531/2012/EB með hinni svo kölluðu TSM reglugerð nr. 2015/2120/EB. Þar var boðað að framkvæmdastjórnin myndi setja nánari reglur um „Roam Like Home“, þ.e. að reikigjöld skyldu miðast við heimaverðskrá notandans. Reikireglugerð nr. 531/2012/EB ásamt þeim breytingum sem gerð var á henni með TSM reglugerðinni hafa verið innleiddar hér á landi með reglugerð ráðherra.
Efni þessarar nýju innleiðingarreglugerðar er tvíþætt. Annars vegar að mæla fyrir um viðmið um hvað skuli teljast sanngjörn notkun, þar sem gjaldfærsla fyrir reikinotkun samkvæmt heimaverðskrá takmarkast við sanngjarna notkun. Hér um að ræða atriði á borð við heimild fjarskiptafyrirtækja til að hafa eftirlit með sanngjarnri notkun notenda, kröfur um að þau setji sér reglur um sanngjarna notkun og hvernig skuli farið með pakkaáskriftir í tengslum við reiki, s.s. innfalið gagnamagn og þess háttar. Hins vegar fjallar reglugerðin um þau kostnaðarlegu skilyrði sem þurfa að vera fyrir hendi til að fjarskiptafyrirtæki sé heimilt að óska eftir undanþágu til þess að mega leggja reikigjöld ofan á gjöld samkvæmt heimaverðskrá.
Reglugerðin felur í sér ný stjórnsýsluverkefni fyrir Póst- og fjarskiptastofnun. Annars vegar er henni falið að yfirfara og samþykkja reglur fjarskiptafyrirtækjanna um sanngjarna notkun og hins vegar að yfirfara kostnaðarforsendur ef beiðni berst um undanþágu fyrir heimild til þess að leggja reikigjöld ofan á heimaverðskrá. Gjaldstofnar stofnunarinnar, einkum hið svo kallaða rekstrargjald, eiga að standa straum af verkefnum sem þessum og er henni því mikilvægt.