32017R0999

Skv. þessum drögum bætast 12 nýir töluliðir, 32. – 43., við lista í XIV. viðauka (skrá yfir efni sem eru leyfisskyld). Flest efnanna (átta af tólf) komast á lista yfir leyfisskyld efni vegna eiturhrifa þeirra á æxlun. Í tveimur tilfellum er um krabbameinsvaldandi efni að ræða sem jafnframt eru þrávirk, safnast fyrir í lífverum og eru eitruð og í tveimur öðrum tilfellum er um að ræða efni sem hafa raskandi áhrif á hormóna¬starfsemi.

Lokadagur fyrir notkun án leyfis er 36 mánuðum eftir gildistöku gerðarinnar fyrir efnin sem hafa eiturhrif á æxlun, 39 mánuðum eftir gildistöku fyrir krabbameinsvaldandi efnin og 42 mánuðum eftir gildistöku í þeim tilfellum sem um raskandi áhrif á hormónastarfsemi er að ræða. Í öllum tilfellum er síðasti dagur framleiðanda, innflytjanda eða eftirnotanda til að sækja um leyfi fyrir sína notkun á viðkomandi efni 18 mánuðum fyrir viðkomandi lokadag.

Aðra breytingu, óskylda ofangreindri viðbót við XIV. viðauka, er einnig að finna í drögunum: Til að koma í veg fyrir ótímabæra fyrningu hluta, sem framleiddir voru leyfilega en innihalda efni sem krefjast nú leyfis eða munu innan skamms krefjast leyfis til notkunar, þurfa téð leyfisskyld efni að vera aðgengileg til framleiðslu varahluta í fyrrgreinda hluti. Til að auðvelda aðgengi að efnunum til nota í slíka varahluti er neðanmáls¬greinum bætt við 23 af liðum XIV. viðauka. Neðanmálsgreinar þessar snúa annars vegar að framlengingu frests til að nota efnin án þess að til leyfisumsóknar þurfi að koma og hins vegar að lengja frestinn til að sækja um leyfi þegar um notkun við framleiðslu slíkra varahluta ræðir.

Reglugerðin tekur gildi á 20. degi eftir birtingu hennar í Stjórnartíðindum Evrópusambandsins.