Jafnvægi milli fjölskyldu- og atvinnulífs foreldra og fólks - 32019L1158

Tilskipunin hefur það að markmiði að stuðla að auknu jafnvægi fjölskyldu- og atvinnulífs foreldra og fólks (Work Life Balance). Í tilskipuninni er mælt fyrir um lágmarkskröfur sem ætlað er að ná fram jafnrétti milli karla og kvenna með tilliti til tækifæra á vinnumarkaði og meðferðar á vinnustað með því að auðvelda starfsmönnum sem eru foreldrar eða umönnunaraðilar að samræma vinnu og fjölskyldulíf.
Í tilskipuninni er meðal annars kveðið á um feðraorlof, sjálfstæðan rétt hvors foreldris fyrir sig til töku foreldarorlofs og á hvaða tímabili heimilt sé að taka orlof. Þá er kveðið á um umönnunarorlof til að annast veika eða aldraða ættingja eða maka. Jafnframt er kveðið á um rétt til sveigjanlegs vinnutíma og settar fram aðgerðir til að stuðla að jafnrétti kynjanna þegar kemur að töku foreldraorlofs.