32018R1807

Í greinargerð sem fylgir tillögunni segir að markmið reglusetningarinnar sé að bregðast við þróun í rafrænni tækni sem felur í sér að ýmiss konar þjónustur í upplýsingatæknisamfélaginu byggja á því að safna og vinna úr upplýsingum, t.d. upplýsingar sem internettengdir hlutir senda frá sér, t.d. með sjálfvirkum aðferðum gervigreindar. Mikil viðskiptaleg verðmæti geta verið fólgin í því að vinna úr slíkum upplýsingum og búa til vörur og þjónustur sem af þeim leiðir, en metið er að velta varðandi viðskipti með slíkar upplýsingar geti numið rúmlega 106 miljarða evra á árinu 2020.

Til þess að stuðla að því að aðgangur að slíkum upplýsingum og viðskipti með þær geti gengið greiðlega fyrir sig er talin vera þörf á því að mæla fyrir um tiltekin réttindi aðila hvað þetta varðar, hvort sem um er að ræða fyrirtæki, einstaklinga eða stjórnvöld. Helstu efnisþættir tillögunar eru:

- Meginregla um frjálst flæði upplýsinga innan EES svæðisins,
- Aðgangur eftirlitstjórnvalda að upplýsingum,
- Þjónustuflutningur þjónustuveita og úrvinnsluaðila upplýsinga,
- Þjónustugátt um upplýsingabeiðnir.

Hvað varðar mat á áhrifum þessarar tillögu m.t.t. til stjórnsýsluverkefna og kostnaðar að þá liggja þessir þættir fyrst og fremst í kröfu um rafræna þjónustugátt (e. Single Point of Contact) til að taka við upplýsingabeiðnum frá aðilum um gögn, jafnt innanlands sem erlendis frá. Umrædd gögn kunna að vera varðveitt í gagnagrunnum sem falla undir eftirlit stjórnvalda á ýmsum sviðum. Því er gert ráð fyrir að komið verði upp miðlægri þjónustugátt fyrir allar upplýsingabeiðnir og að tilteknu stjórnvaldi verði falið að setja gáttina upp og annast þjónustu hennar. Í greinargerð með tillögunni er kostnaður einstakra aðildarríkja við að koma upp slíkri gátt metinn á rúmar 4 milljónir króna (á gengi dagsins í dag) en árlegur rekstrarkostnaður sé óverulegur eða um 300 þúsund krónur á ári. Ekki er vitað til þess að í þessum kostnaði felist umsjónartími þeirra sem sinna munu verkefninu.

Með tilliti til þess að gert er ráð fyrir því að stjórnvaldið sem rekur upplýsingagáttina sé aðili sem starfi þvert á alla geira, þ.e. á sviðum samfélagsins sem kunna lúta eftirliti tiltekinna eftirlitsstjórnvalda, myndi e.t.v. ekki fara vel á því að fela eftirlitsstjórnvaldi á tilteknu sviði (e. sector specific authority), t.d. á borð við PFS, að annast umrætt verkefni.