Útdráttur
Gerðin felur í sér breytingu á innleiðingargerð framkvæmdastjórnar ESB um aðferðir til að afla gagna um úrgang sem kemur upp með veiðarfærum (Implementing Regulation (EU) 2022/92 as regards certain reporting requirements for passively fished waste). Breytingin felst í því að í stað þess að skila inn gögnum árlega til framkvæmdastjórnar ESB skal skila inn gögnum fyrir tvö almanaksár á tveggja ára fresti.
Nánari efnisumfjöllun
Vísað er til greiningar á innleiðingargerð um aðferðir til að afla gagna um úrgang sem kemur upp með veiðarfærum, sem sett er samkvæmt heimild í tilskipun um aðstöðu í höfnum til að taka á móti úrgangi skipa og farmleifum (Directive (EU) 2019/883 of the European Parliament and of the Council of 17 April 2019 on port reception facilities for the delivery of waste from ships, amending Directive 2010/65/EU and repealing Directive 2000/59/EC). Í þeirri innleiðingargerð er mælt fyrir um með hvaða aðferðum eigi að afla gagna um úrgang sem kemur upp með veiðarfærum til að tryggja að ríki afli þeirra með samræmdum hætti og einnig hvernig og hversu oft eigi að skila inn gögnum til framkvæmdastjórnarinnar. Er þar mælt fyrir um að frá 1. janúar 2022 skuli aðildarríki skila inn gögnum og upplýsingum árlega fyrir eitt almanaksár, en þó skuli skila inn gögnum fyrir árið 2021 eins og hægt er eigi síðar en 30. júní 2022. Í inngangi með innleiðingargerð framkvæmdastjórnar ESB 2024/917 kemur fram að mikilvægt sé að straumlínulaga ákvæðin um gagnaskil til að tryggja að þau nái tilætluðum tilgangi og til að takmarka stjórnsýslubyrði. Nægjanlegt sé að skila inn gögnum um úrgang sem kemur upp með veiðarfærum á tveggja ára fresti til að vakta hvort þau kerfi sem sett hafa verið upp skili árangri og fylgjast með hvernig fiskiskip stuðla að því að draga úr úrgangsmengun í umhverfi sjávar til lengri tíma litið. Því er lagt til að aðildarríkjum verði skylt að skila inn gögnum fyrir tvö almanaksár á tveggja ára fresti í stað þess að skila gögnum árlega. Frá og með 1. janúar 2024 skulu aðildarríki skila inn gögnum og upplýsingum fyrir tveggja ára tímabil. Skýrslum skal skila rafrænt innan 12 mánaða frá lokum síðara ársins sem gögnin eiga við um. Fyrstu skýrslu skal skilað eigi síðar en 31. desember 2026. Innleiðingarreglugerð (ESB) 2022/92 sem breytt er með þeirri innleiðingarreglugerð sem hér er til greiningar (ESB) 2024/917 hefur ekki verið tekin upp í íslensk lög þar sem enn er í gildi stjórnskipulegur fyrirvari um samþykki tilskipunar ESB 2019/883 í EES samninginn.
