Framseld reglugerð framkvæmdastjórnarinnar 2024/3214 um breytingar á reglugerð (ESB) 2015/757 um vöktun á losun gróðurhúsalofttegunda frá aflandsskipum og eldsneyti með losunarstuðulinn núll. - 32024R3214

Með framseldri reglugerð framkvæmdastjórnarinnar (ESB) 2024/3214 sem hér er til greiningar voru gerðar breytingar á reglugerð (ESB) 2015/757 sem fjallar um vöktun, skýrslugjöf og sannprófun á losun koltvísýrings frá sjóflutningum sem fellur undir viðskiptakerfi ESB með losunarheimildir. Viðaukar við reglugerð (ESB) 2015/757 eru tveir, viðauki I setur fram aðferðir við vöktun á losun gróðurhúsalofttegunda byggt á eldsneytisnotkun og viðauki II setur fram reglur varðandi vöktun annarra viðeigandi upplýsinga. Með reglugerð ESB 2024/3214 eru gerðar breytingar á fyrrnefndum viðaukum, annars vegar til að setja fram skilgreiningar á þeim aflandsskipum (e. offshore ships) sem vakta skal losun gróðurhúsalofftegunda frá og hins vegar til að tryggja að reglur er varða skráningu sjálfbærs eldsneytis með losunarstuðulinn núll (e. zero-rated fuels) séu í samræmi við aðra geira sem falla undir ETS-kerfið. Skilgreiningar á aflandsskipumMeð reglugerð (ESB) 2023/957 voru gerðar þær breytingar á reglugerð (ESB) 2015/757 að vakta skyldi losun gróðurhúsalofttegunda frá aflandsskipum frá 1. janúar 2025. Losun gróðurhúsalofttegunda frá aflandsskipum yfir 5000 brúttótonnum mun falla undir ETS-kerfið frá 1. janúar 2027. Aftur á móti voru ekki settar fram frekari skilgreiningar á því hvers konar skip teldust sem aflandsskip. Þessu er bætt úr með þeirri reglugerð sem hér er til greiningar með því að bæta við kafla í viðauka I við reglugerð (ESB) 2015/757, hluta AA, sem kemur á eftir hluta A.Í þessum nýja hluta viðauka I kemur fram að losun gróðurhúsalofttegunda frá aflandsskipum skuli ná yfir losun gróðurhúsalofttegunda frá síðustu viðkomuhöfn til viðkomuhafnar innan Evrópska efnahagssvæðisins (EES) og frá viðkomuhöfn innan EES til næstu viðkomuhafnar, auk losunar sem á sér stað í höfnum innan EES frá þeim skipum sem talinn er upp í liðum (a) til (ae), annarra en ísbrjóta sem eru hannaðir eða vottaðir til að gegna þjónustuhlutverki af landi eða á aflandsstöðvum (e. service activities offshore or at offshore installations).Þessar breytingar taka gildi frá 1. janúar 2025, í samræmi við það að vöktun og skýrslugjöf vegna losunar gróðurhúsalofttegunda frá aflandsskipum (e. offshore ships) fellur undir gildissvið reglugerðar (ESB) 2015/757 frá þeirri dagsetningu. Eldsneyti með losunarstuðulinn núllUppfæra þurfti reglur í viðauka II í reglugerð (ESB) 2015/757 til að þær væru í samræmi við þær reglur sem gilda fyrir aðra geira sem falla undir ETS-kerfið hvað varðar eldsneyti sem fullnægir skilyrðum til að hafa losunarstuðulinn núll, sérstaklega til að bjóða upp á möguleikann að tilbúið lágkolefnaeldsneyti (e. synthetic low-carbon fuel) geti fengið losunarstuðulinn núll.Í þessu skyni voru, með reglugerð þeirri sem hér er til greiningar, gerðar breytingar á 2. mgr. liðar 1.2. í C-hluta viðauka II við reglugerð ESB 2015/757. Breytingarnar fela í sér að undanþágur frá hinni almennu meginreglu til vöktunar á uppsafnaðri heildarlosun gróðurhúsalofttegunda frá skipi, sem sett er fram í lið 1.1., nær nú einnig til tilbúins lágkolefnaeldsneytis til viðbótar við endurnýjanlegt eldsneyti af ólífrænum uppruna (e. Renewable Fuels of Non-Biological Origin, RFNBO) og endurunnið kolefnaeldsneyti (e. Recycled Carbon Fuel, RCF). Í 1.2. lið kemur fram að í stað þess að almennu meginreglunni sé beitt skuli losunarstuðlar koltvísýrings fyrir þessar tegundir eldsneytis vera ákvarðaðir í samræmi við reglugerð (EU) 2018/2066 um vöktun og skýrslugjöf, með þeim breytingum sem gerðar hafa verið á henni með reglugerð (ESB) 2024/2493, sbr. formálsorð 8 í þeirri reglugerð sem hér er til greiningar. Reglugerð (ESB) 2024/2493 hefur ekki verið tekin upp í EES samninginn þegar þetta er skrifað.Sjóflutningar féllu undir ETS frá 1. janúar 2024. Þær reglur sem gilda um aðra um aðra geira innan ETS hvað varðar eldsneyti sem fullnægir skilyrðum til að hafa losunarstuðulinn núll samkvæmt reglugerð (ESB) 2018/2066 og þeim breytingum sem gerðar voru á henni með reglugerð (ESB) 2024/2493, gilda frá 1. janúar 2024. Til að tryggja samræmi taka þær breytingar sem gerðar eru á viðauka II við reglugerð 2015/757, með þeirri reglugerð sem hér er til greiningar, gildi afturvirkt frá 1. janúar 2024.