Reglugerð um breytingu á reglugerð um áhættusöm þriðju lönd (Rússland) - 32026R0046

Framseld reglugerð (ESB) 2016/1675 er innleidd hér á landi með reglugerð nr. 105/2020 um áhættusöm þriðju lönd vegna aðgerða gegn peningaþvætti og fjármögnun hryðjuverka. Með reglugerðinni fylgir listi yfir þau ríki sem talin eru glíma við kerfisbundna ágalla í varnar­kerfi gegn peningaþvætti og fjármögnun hryðjuverka og geta þannig skapað verulega áhættu fyrir fjármálakerfi Evrópusambandsins og EES-ríkjanna. Breytingar á listanum eru innleiddar hér á landi með breytingarreglugerðum við reglugerð nr. 105/2020.Framseld reglugerð framkvæmdastjórnarinnar sem hér um ræðir byggir á 9. gr. tilskipunar (ESB) 2015/849 og á endurskoðunarákvæði sem var tekið upp með framseldri reglugerð (ESB) 2025/1393. Sú reglugerð, sem innleidd var í íslenskan rétt með reglugerð nr. 1221/2025 um (8.) breytingu á reglugerð um áhættusöm þriðju lönd nr. 105/2020, kveður á um að framkvæmdastjórnin ljúki fyrir árslok 2025 sjálfstæðri rýni á þriðju löndum sem ekki hafa verið skilgreind af alþjóðlega fjármálaaðgerðahópnum FATF sem ríki sem sæta aðgerðum eða auknu eftirliti, en hafa verið svipt eða hafa ógilda aðild að FATF um stundarsakir, til að meta hvort breyta þurfi viðaukanum við framseldu reglugerðina (ESB) 2016/1675 í samræmi við það.Í kjölfar þeirrar endurskoðunar er niðurstaða framkvæmdastjórnarinnar sú að Rússland búi við verulega kerfisbundna ágalla í regluverki og framkvæmd aðgerða gegn peningaþvætti og fjármögnun hryðjuverka. Sérstaklega er bent á skort á sjálfstæði fjármálaupplýsingasviðs landsins og takmarkaða alþjóðlega samvinnu þess, skort á i gagnsæi og aðgengi að upplýsingum um raunverulega eigendur lögaðila og vanskil á innleiðingu tilmæla FATF um reglusetningu og eftirlit með þjónustu sem tengist sýndareignum. Telur framkvæmdastjórnin að ágallarnir feli í sér verulega áhættu fyrir fjármálakerfi Evrópusambandsins og EES og skuli skilgreint sem áhættusamt þriðja land.Ólíkt mörgum fyrri breytingum á listanum leiðir þessi breyting því ekki af nýrri ákvörðun FATF  heldur sjálfstæðri rýni framkvæmdastjórnarinnar samkvæmt framseldri reglugerð (ESB) 2025/1393, eins og hún hefur verið innleidd í íslenskan rétt með reglugerð nr. 1221/2025. Með reglugerðinni var viðauka við framseldu reglugerðina (ESB) 2016/1675 breytt þannig að tekin er upp ný flokkun fyrir þriðju lönd sem hafa verið svipt aðild að FATF án þess að vera á lista samtakanna, og Rússland fært í þann flokk. Þetta hefur í för með sér að Rússland bætist á lista reglugerðar nr. 105/2020 yfir áhættusöm þriðju lönd og að íslenskir tilkynningarskyldir aðilar skulu beita hertu áreiðanleikakönnunum í viðskiptum sem tengjast landinu.