F-gas - 32015R2067

Matsaðili sér um að prófa bók- og verklega færni og þekkingu í samræmi við I. viðauka reglugerðarinnar. Matsaðilinn skal halda skrá um niðurstöður mats skv. ákvæðum í reglugerðinni. Vottun einstaklinga og fyrirtækja, sem staðist hafa mat hjá matsaðila, skal vera í höndum vottunaraðila sem kveðið er á um í landslögum eða er tilgreindur af lögbæru stjórnvaldi. Vottunaraðili getur líka verið matsaðili.

Einstaklingar skulu hafa vottun til þeirra verka sem þeir vinna (lekaprófa, setja upp, gera við, halda við og þjónusta, taka úr notkun eða endurheimta kælimiðla) við staðbundinn kæli-, loftræsti- og varmadælubúnað sem inniheldur flúoraðar gróðurhúsalofttegundir og kælibúnað í bílum og aftanívögnum. Fyrirtæki sem sjá um að setja upp, gera við, halda við, þjónusta eða taka úr notkun staðbundinn kæli-, loftræsti- og varmadælubúnað fyrir þriðja aðila, skulu einnig hafa vottun.

Vottunaraðili skal gefa út skírteini til handa einstaklingum sem staðist hafa mat. Fjögur stig réttinda eru í boði. Útlistað er hvaða upplýsingar skuli, að lágmarki, koma fram á skírteininu.

Vottunaraðili skal gefa út skírteini til handa fyrirtækjum sem standast skilyrði gerðarinnar um vottað starfsfólk og tækjabúnað til þeirra verka sem fyrirtækið ætlar að sjá um.

Eigi síðar en 1. janúar 2017 skulu aðildarríkin tilkynna til framkvæmda-stjórnarinnar hvaða aðili annist vottanir í viðkomandi ríki auk heitis skírteinanna sem gefin verða út.

Reglugerðin tekur gildi á 20. degi eftir birtingu hennar í Stjórnartíðindum Evrópusambandsins. Þó skal krafan um vottun þeirra sem þjónusta kælibúnað í bílum og aftanívögnum skv. þessari reglugerð ekki taka gildi fyrr en 1. júlí 2017.