32017R1503

Almennt: Með reglugerð (ESB) nr. 165/2014 um ökurita í flutningum á vegum, niðurfellingu reglugerðar ráðsins (EBE) nr. 3821/85 um að taka upp skráningarbúnað í ökutækjum í flutningum á vegum og breytingu á reglugerð Evrópuþingsins og ráðsins (EB) nr. 561/2006 um samhæfingu tiltekinna ákvæða félagsmálalöggjafarinnar er varða flutninga á vegum, var samtenging rafrænna landsskráa yfir ökumannskort gerð lögboðin á öllu EES svæðinu. Þetta átti annaðhvort að gera með notkun TACHO-net kerfisins eða með samhæfðu kerfi í því skyni að koma í veg fyrir að umsækjandi ökumannskorts væri handhafi fleiri en eins gilds korts.
Með framkvæmdarreglugerð (ESB) 2016/68 er mælt fyrir um lögboðnar sameiginlegar verklagsreglur og forskriftir fyrir TACHO- net kerfið, þ.m.t. snið gagna sem skipst er á, tæknilegar verklagsreglur við rafræna leit í rafrænum landsskrám, aðgangsreglur og öryggisfyrirkomulag.
Í framkvæmdarreglugerð (ESB) 2017/1503 er kveðið á um tilteknar tæknilegar breytingar í því skyni að bæta samtengingu skráa og virkni kerfisins auk þess sem gert er ráð fyrir að ríki utan sambandsins geti tengt sínar skrár inn á TACHO-net kerfið.
Efnisútdráttur: Nánar tiltekið felur reglugerð (ESB) 2017/1503 í fyrsta lagi í sér frekari tæknilega útfærslu á tengingum landskerfis við TACHO-net kerfið, þ. á m. um forprófanir og viðbrögð vegna bilana.
Í öðru lagi felur reglugerðin í sér ákvæði um að TACHO-net kerfið sé ekki eingöngu opið aðildarríkjum heldur einnig ríkjum utan sambandsins. Þannig geta þriðju ríki tengt landskrár sínar við TACHO-net kerfið með heimild Framkvæmdastjórnarinnar. Hafi ríki utan sambandsins fengið slíka heimild ber þeim að fylgja ákvæðum reglugerðarinnar.
Í þriðja lagi felur reglugerð (ESB) 2017/1503 í sér að ríki sem óska óbeinna tenginga landskerfa við TACHO-net kerfið skuli óska eftir því með formlegri beiðni til Framkvæmdastjórnarinnar.
Fram kemur að þær tæknilegu breytingar á TACHO-net kerfinu sem um er að ræða skuli koma til framkvæmda frá og með 2. mars 2018. Í því skyni að undirbúa gildistökuna þyki rétt að ákvæði reglugerðarinnar um tengingar ríkja utan sambandsins, forprófanir og ákvæði um óbeinan aðgang að TACHO-net kerfinu, taki gildi strax við gildistöku reglugerðar þessarar.
Umsögn: Við innleiðingu rafrænnar landskrár, verða TACHO-net samskipti færð yfir í EUCARIS kerfið og um leið uppfærð í nýjustu útgáfu þeirra samskiptastaðla.
Við þá uppfærslu mun Ísland uppfylla þær tæknilegar kröfur sem gerðar eru í þeirri reglugerð sem hér er til umræðu. Á sama tíma mun Samgöngustofa uppfæra viðeigandi verklagsreglur. Kostnaður við innleiðingu þessarar reglugerðar er metinn óverulegur sem enginn.
Samgöngustofa hefur yfirumsjón og ábyrgð með rekstri TACHOnet.