32018L0844

Ísland hefur fengið undanþágur frá tilskipunum um orkunýtni (Energy Efficiency) og orkunýtni bygginga (Energy Performance of Buildings) og stefnir að því að svo verði áfram. Ísland hefur undanþágu frá eldri tilskipun um orkunýtni bygginga og hefur farið fram á undanþágu frá þeirri frá 2010. Einnig hefur Ísland farið fram á undanþágu frá tilskipun um orkunýtni frá 2012. Ísland hefur þó innleitt tilskipanir sem varða raftæki, þ.e. tilskipanir um visthönnun og orkumerkingar, sem leitt hafa til töluverðs orkusparnaðar. Sérstaða Íslands er fólgin í hárri hlutdeild endurnýjanlegra orkugjafa. Báðar tilskipanir um orkunýtni frá 2012 og orkunýtni bygginga frá 2010 eru til skoðunar í EFTA-vinnuhópi um orkumál. Einnig eru nýjar tillögur að breytingu á tilskipunum um orkunýtni bygginga (Energy Performance of Buildings II) og orkunýtni, sem framkvæmdastjórn ESB lagði fram 30. nóvember 2016, nú til skoðunar hjá þeim vinnuhópi. Almennt samkomulag um orkunýtni bygginga náðist innan ráðsins í júní 2017 og þríhliða viðræðum lauk í lok árs 2017. Ísland hefur komið því á framfæri við framkvæmdastjórn ESB að áfram verði krafist undanþágu frá tilskipunum um orku¬nýtni frá 2012 og orkunýtni bygginga frá 2010. Fundir með framkvæmdastjórn hafa verið haldnir á árunum 2016, 2017 og á þessu ári á öllum stigum þar sem sterkum rökum fyrir undanþágum var komið á framfæri, m.a. með yfirmanni stjórnarsviðs orkumála hjá framkvæmdastjórninni. Frekari gögn hafa verið lögð fyrir framkvæmdastjórnina til að rökstyðja nauðsyn Íslands á undanþágum. Einnig hefur framkvæmdastjórn ESB verið boðið til Íslands til að kynna sér málið og aðstæður.