Breyting á reglugerð (ESB) 2018/2066 um vöktun og skýrslugjöf vegna losunar gróðurhúsalofttegunda skv. tilskipun 2003/87/EB. - 32020R2085

Í reglugerð (ESB) 2018/2066 koma fram reglur um vöktun á losun vegna lífmassa sem eru í samræmi við tilskipun Evrópuþingsins og ráðsins 2009/28/EB. Sú tilskipun er felld úr gildi með tilskipun (ESB) 2018/2001 frá og með 1. Júlí 2021 sem að aðildarríkin eiga að innleiða fyrir 30. Júní 2021. Í ljósi þess var reglugerð (ESB) 2020/2085 sett, sem hér er til greiningar, til að samræma ákvæði sem snúa að vöktun og skýrslugjöf vegna losunar lífmassa sem mælt er fyrir um í reglugerð (ESB) 2018/2066 við reglur sem settar eru fram í tilskipun (ESB) 2018/2001, þá sér í lagi það sem viðkemur viðeigandi skilgreiningum, sjálfbærni og sparnaðarviðmiðum vegna losunar gróðurhúsalofttegunda vegna notkunar lífmassa.
Bætt er við nýjum skilgreiningum sem varða reglugerð 2018/2066, þá sérstaklega orðinu lífmassa og tengdum hugtökum, svo sem lífeldsneyti, lífgasi, úrgangi, og leifum eða auka efnum í framleiðslu.
Skv. 6. tölul. 1. gr. reglugerðar þessarar eru gerðar breytingar á 38. gr. reglugerðar (ESB) 2018/2066 sem fjallar um efnisstrauma lífmassa. Sett er inn ný málsgrein, 5. mgr., þar sem því er bætt við að lífeldsneyti, lífvökvar og lífmassa eldsneyti (e. biofuels, bioliquids and biomass fuels) sem notað er til brennslu skuli uppfylla sjálfbærni og sparnaðarviðmið vegna losunar gróðurhúsalofttegunda. Aðrar málsgreinar sömu greinar skulu ávallt taka mið af 5. mgr.Í 39. gr. er bætt er við leiðbeiningum og reglum fyrir rekstraraðila þegar kemur að vöktun og skýrslugjöf vegna notkunar náttúrugass og lífgass sem nýtir sama gasleiðslukerfi. Hvernig áætla skuli hlut lífmassa og lífgass í slíkum tilfellum og forðast tvöfalda talningu á magni lífgass. Í 3. mgr. sömu greinar segir að rekstraraðili skuli ekki nota greiningar eða áætlunaraðferðir skv. 2. mgr. til að ákvarða hlut lífmassa náttúrugass sem kemur frá gasleiðslukerfum þar sem lífgasi er einnig bætt við kerfið. Einnig er því bætt við að rekstraraðili hafi heimild til að ákvarða hlut lífmassa með því að miða við reikningsfærslur vegna kaupa af lífgasi af samsvarandi orkuinnihaldi en þó skal gæta þess og sanna fyrir lögbæru stjórnvaldi að ekki hafi átt sér stað tvítalning á sama lífgasmagninu. Þetta er hægt að gera með yfirlýsingu um upprunaábyrgð. Einnig þarf að sýna fram á að rekstraraðili og framleiðandi lífgassins séu tengdir sama gasleiðslukerfi. Rekstraraðili getur nýtt sér gögn sem skráð eru í gagnabanka sem settur er upp af einu eða fleiri aðildarríkjum til að uppfylla þær kröfur sem settar eru fram í þessari málsgrein.
Skv. 10. tölul. 1. gr. reglugerðar þessarar er ný 54. gr. sett inn í reglugerð (ESB) 2018/2066 í stað þeirrar sem var þar fyrir, sem fjallar um sérákvæði fyrir lífeldsneyti. Þar kemur fram að losunarstuðull frá lífeldsneyti skuli vera núll. Tekið er á lífeldsneyti sem blandað hefur verið með jarðefnaeldsneyti og nokkuð ýtarlegum leiðbeiningum er bætt inn fyrir flugrekendur um aðferðir greininga á hlut lífmassa í blönduðu eldsneyti sem þeir fá afhent en eftirfarandi aðferðir eru leyfilegar:
• Flugrekandi getur ákvarðað að lífeldsneyti sé ekki til staðar og notað sjálfgefinn hluta jarðefnaeldsneytis upp á 100%.
• Ef eldsneyti er afhent ákveðnu loftfari í auðkennandi skömmtum, getur flugrekandi framkvæmt greiningu samkvæmt 32. og 35. gr. sömu reglugerðar til að áætla hlut lífmassa á grundvelli viðeigandi staðla og greiningaraðferðum að því tilskyldu að tilteknir staðlar og greiningaraðferðir séu samþykkt af lögbæru stjórnvaldi. Ef sannað er (fyrir lögbæru stjórnvaldi) að slíkar aðferðir leiði að sér óraunhæfan kostnað eða eru tæknilega óframkvæmanlegar getur flugrekandi áætlað innihald lífefnis byggt á massajafnvægi jarðefnaeldsneytis og lífeldsneytis sem keypt er inn.
• Þar sem keyptir lífeldsneytisskammtar eru ekki afhentir ákveðnu loftfari getur flugrekandi ekki notað greiningar til að áætla hlut lífmassa þess eldsneytis sem notað er en getur þó ákvarðað hlut lífmassa með þvi að nota reikningsfærslur fyrir kaup á lífeldsneyti af samsvarandi orkuinnihaldi, gefið að fullnægjandi sönnun þess að ekki sé um tvöfaldan útreikning að ræða sé veitt lögbæru stjórnvaldi.
Skv. 11. tölul. 1. gr. reglugerðar þessarar er fyrstu undirmálsgrein 1. mgr. 72. gr. reglugerðar (ESB) 2018/2066 skipt út fyrir eftirfarandi: „Árleg heildarlosun á hverri gróðurhúsalofttegund fyrir sig, CO2, N2O og PFC, skal vera skráð sem námundað tonn af CO2 eða CO2(e). Árleg heildarlosun starfsstöðvar skal reiknuð sem summa af námunduðum gildum fyrir CO2, N2O og PFC.
Skv. 12. tölul. 1. gr. reglugerðar þessarar, sbr. viðauka I, er viðaukum I og X við reglugerð (ESB) 2018/2066 breytt til að samræma þá við nýja 5. mgr. 38. gr. þeirrar reglugerðar.
Skv. 13. tölul. 1. gr. reglugerðar þessarar, sbr. viðauka II, eru gerðar breytingar á viðaukum II, IV og VI við reglugerð (ESB) 2018/2066. M.a. er gerð breyting á 4. kafla í viðauka II þar sem skilgreining aðferðarþrepa fyrir reiknistuðla fyrir losun koldíoxíðs kemur í stað aðferðaþrepa fyrir reiknistuðla vegna niðurbrots karbónats sem nær þá yfir losun koldíoxíð frá framleiðsluefni kolefnis í öðru formi en karbónats og eru viðaukar aðlagaðir að þessari breytingu.
Einnig er tafla 6 úr viðauka IV uppfærð vegna mats milliríkjanefndar um loftlagsbreytingar um ný gildi fyrir hnatthlýnunarmátt jarðar. Þau gildi sem eru notuð eru innan viðskiptakerfis ESB með losunarheimildir eru þannig aðlöguð til samræmis við aðrar gerðir Sambandsins
Til að forðast að gera greinarmun á ólífrænu kolefni (oftast karbónötum) og lífrænu kolefni er greining heildarmagns kolefnis leyfð þar sem það er mögulegt. Orðalag er aðlagað að þessu í viðauka II þessarar reglugerðar, þar sem notast er við orðalagið “kolefni önnur en karbónöt” í stað “lífræns kolefnis”.
Villa fannst við formúlu í undirkafla B í kafla 8 í viðauka IV við reglugerð (ESB) 2018/2066 sem notuð er til að ákvarða losun perflúorkolefnis (C2F6) og er því leiðrétt formúla sett inn skv. 2.gr. reglugerðar þessarar.
Þær breytingar sem eru gerðar á reglugerð (ESB) 2018/2066 til að samræma ákvæði hennar við tilskipun (ESB) 2018/2001 eiga að taka gildi við byrjun næsta reikningskilatímabils , þ.e. 1. janúar 2022, en dagsetning umsóknar vegna annarra breytinga eða leiðréttinga, var sú sama og fyrir reglugerð (ESB) 2018/2066, þ.e. 1. janúar 2021. Því halda núgildandi ákvæði reglugerðar (ESB) 2018/2066 um vöktun og skýrslugjöf fyrir losun koldíoxíðs frá lífmassa samkvæmt tilskipun 2009/28/EB halda áfram að gilda vegna losunar sem á sér stað á árinu 2021.