Framkvæmdarreglugerð framkvæmdastjórnarinnar (ESB) 2022/388 um breytingu á framkvæmdarreglugerð (ESB) 2018/2066 um vöktun á losun gróðurhúsalofttegunda og skýrslugjöf um losunina samkvæmt tilskipun Evrópuþingsins og ráðsins 2003/87/EB - 32022R0388

Reglugerð (ESB) 2018/2066 fjallar um vöktun og skýrslugjöf í viðskiptakerfi ESB með losunarheimildir. Hér er vísað til hennar sem MRR-reglugerðarinnar (Monitoring and Reporting Regulation). Í 38. gr. reglugerðarinnar er fjallað um útreikning á losun frá lífmassa frá starfsstöðvum sem heyra undir viðskiptakerfið. Í 2. mgr. greinarinnar kemur fram að losunarstuðull lífmassa skuli vera núll, sem leiðir til þess að rekstraraðilum er ekki skylt að standa skil á losunarheimildum vegna slíkrar losunar. Með reglugerð (ESB) 2020/2085 var nýrri 5. mgr. bætt við greinina þar sem sett voru nánari skilyrði þess að telja mætti losun frá lífmassa sem núll. Nánar tiltekið var kveðið á um að frá 1. janúar 2022 skyldi lífmassi uppfylla svokallaðar sjálfbærni- og losunarsparnaðarkröfur tilskipunar (ESB) 2018/2001 (RED II-tilskipunar). Um er að ræða ítarlegar kröfur sem varða m.a. áhrif af framleiðslu lífmassaeldsneytis á líffræðilega fjölbreytni, kolefnisforða lands og losun gróðurhúsalofttegunda. Ef lífmassi uppfyllir ekki umræddar kröfur skal litið á kolefnisinnihald hans sem kolefni úr jarðefnaeldsneyti, sbr. niðurlag 5. mgr. Sjá nánar upplýsingablað Umhverfisstofnunar um reglugerð (ESB) 2020/2085. Vegna tafa sem orðið hafa á innleiðingu RED II-tilskipunarinnar í sumum aðildarríkjum, auk tafa hjá framkvæmdastjórn ESB við að samþykkja reglur og leiðbeiningar varðandi sjálfbærnivottun lífmassaeldsneytis, hefur nú verið ákveðið að fresta beitingu ofangreindrar 5. mgr. 38. gr. MMR-reglugerðarinnar til 1. janúar 2023. Með reglugerðinni sem hér er til umfjöllunar, reglugerð (ESB) 2022/388, er nýrri málsgrein, 6. mgr., bætt við 38. gr., þar sem fram kemur að aðildarríki megi líta svo á að sjálfbærni- og losunarsparnaðarkröfurnar séu uppfylltar fyrir lífmassa sem er notaður til brennslu á árinu 2022. Aðildarríkjum er með öðrum orðum heimilað að undanþiggja starfsstöðvar frá því að uppfylla sjálfbærni- og losunarsparnaðarkröfurnar á árinu 2022 án þess að það hafi áhrif á heimild viðkomandi rekstraraðila til að reikna losun frá lífmassa sem núll