Sjálfgefin losunargildi fyrir kolefnisjöfnunarkerfi við landamær - 32025R2621

Samkvæmt 7. gr. reglugerðar (ESB) 2023/956 um kolefnisjöfnunarkerfi við landamæri (CBAM) er kveðið á um notkun sjálfgefinna gilda við útreikning á innbyggðri losun gróðurhúsalofttegunda í vörum að undanskildu rafmagni sem og við útreikning á óbeinni innbyggðri losun. Reglugerðin sem hér er til umfjöllunar felur í sér ákvörðun slíkra sjálfgefinna gilda.  Í samræmi við 7. gr. reglugerðar (ESB) 2023/956 skulu sjálfgefin gildi reiknuð á grundvelli þeirrar aðferðarfræði sem mælt er fyrir um í IV. viðauka þeirrar reglugerðar. Jafnframt er kveðið á um að gildin skuli uppfærð reglulega og byggð á nýjustu og áreiðanlegustu gögnunum þannig að þau endurspegli sem best raunverulega losun sem tengist framleiðslu viðkomandi vara.  Til að tryggja að sjálfgefin gildi leiði ekki til vanmats á innbyggðri losun er bætt við álagi. Álagið byggist á skekkjumörkum sem endurspegla frávik í losun milli einstakra framleiðslueininga, með hliðsjón af gögnum um losun frá framleiðslu innan Evrópusambandsins.  Til að veita CBAM-tilkynnendum og rekstraraðilum svigrúm til að aðlagast nýju kerfi er kveðið á um að álagið verði innleitt stigvaxandi á tímabilinu til ársins 2028. Jafnframt er þessi stigvaxandi innleiðing talin stuðla að því að halda verði CBAM-vottorða stöðugu á fyrstu árum kerfisins, þegar CBAM er að komast til framkvæmda.  Við innflutning vöru eða forefnis (e. precursors) þar sem uppruni framleiðslunnar er ekki þekktur er samkvæmt reglugerðinni kveðið á um að beita skuli hæsta viðeigandi sjálfgefna gildi fyrir viðkomandi forefni. Markmiðið með þessu ákvæði er að koma í veg fyrir kolefnisleka og fyrirbyggja misnotkun CBAM-kerfisins.  Að lokum er kveðið á um að framkvæmdastjórnin skuli endurskoða og, eftir atvikum, uppfæra sjálfgefin gildi og viðeigandi álagningu eigi síðar en í lok árs 2027.