Ákvörðun ESB um úthlutun árlegra losunarheimilda aðildarríkja 2021-2030. - 32020D2126

Sú ákvörðun sem hér er til greiningar er framkvæmdarákvörðun framkvæmdarstjórnar ESB 2020/2126 (hér eftir ,,ákvörðunin”) og er hluti af orku- og loftslagspakka ESB til ársins 2030 sem snýr að skyldubundnu lágmarksframlagi aðildarríkja svo ná megi markmiði Evrópusambandsins í samdrætti á losun gróðurhúsalofttegunda fyrir tímabilið 2021-2030.
Ákvörðunin er byggð á reglugerð ESB 2018/842 um bindandi, árlegan samdrátt aðildarríkjanna á losun gróðurhúsalofttegunda á árunum 2021 til 2030 sem framlag til loftslagsaðgerða til að uppfylla skuldbindingar samkvæmt Parísarsáttmálanum.

Ákvörðunin er sett á grundvelli 3. mgr. 4. gr. reglugerðar ESB 2018/842 þar sem fram kemur að framkvæmdastjórnin skuli samþykkja framkvæmdargerðir þar sem ákvörðuð er árleg losunarheimild fyrir árin 2021-2030 ásamt gildi losunar gróðurhúsalofttegunda fyrir hvert ríki á árinu 2005 sem notað er til viðmiðunar. Í 4. mgr. 4. gr. sömu reglugerðar kemur fram að framkvæmdastjórnin skuli einnig tilgreina í framkvæmdargerðum heildarmagnið sem má taka tillit til hjá þeim aðildarríkjum sem heimilt er að fá takmarkaða ógildinu á losunarheimildum, sbr. 6. gr. reglugerðar ESB 2018/842, sbr. 3. gr. ákvörðunar þessarar.

Ákvörðunin tilgreinir úthlutun árlegra losunarheimilda aðildarríkja fyrir árin 2021-2030 annars vegar og ákvörðuð gildi á losun fyrir árið 2005 hins vegar. Að auki er heildarmagnið ákvarðað hjá þeim aðildarríkjum sem heimilt er að fái takmarkaða ógildinu á losunarheimildum.

Árleg losun er reiknuð í koldíoxíðsígildum til að samræma hnatthlýnunarmátt mismunandi gróðurhúsalofttegunda.

Um 1. grein
Ákvörðuð gildi á losun fyrir árið 2005, sem sett eru fram í 1. gr. ákvörðunarinnar, sbr. viðauka I, eru byggð á nýjustu gögnum í samráði við Umhverfisstofnun Evrópu (European Environment Agency). Magn gróðurhúsalofttegunda frá staðbundnum iðnaði (sem fellur undir tilskipun 2003/87/EB) innan ETS kerfisins er dregið frá heildarlosun ársins 2005.

Um 2. grein
2. gr. ákvörðunarinnar fjallar um árlega losunarheimild til hvers aðildarríkis fyrir árin 2021-2030 og eru tölurnar settar fram í viðauka II við ákvörðun þessa. Árleg losunarheimilid fyrir árið 2030 er reiknuð út frá losun ársins 2005 með því að nota þann hlutfallslega samdrátt losunar sem ákvarðaður hefur verið fyrir hvert aðildarríki í viðauka I við reglugerð ESB 2018/842.

Meðallosun gróðurhúsalofttegunda innan gildissviðs reglugerðar (ESB) 2018/842 fyrir árið 2016, 2017 og 2018 er reiknuð fyrir hvert aðildarríki með því að draga tvennt frá heildarlosun gróðurhúsalofttegunda fyrir þessi ár, annars vegar losun gróðurhúsalofttegunda frá staðbundnum iðnaði (sem fellur undir tilskipun 2003/87/EB) og hins vegar losun koldíoxíðs frá innanlandsflugi.

Árleg losunarheimild fyrir árin 2021 til 2029 er reiknuð út á grundvelli línulegs ferils þar sem upphafspunkturinn er fimm tólftu af bilinu milli 2019 og 2020 með gildið sem samsvarar meðallosun fyrir 2016, 2017 og 2018 og lokapunkturinn er árið 2030. Fyrir þrjú aðildarríki (Grikkland, Króatíu og Ungverjaland) er upphafspunkturinn 2020.
Aðlögun á losunarheimildum áranna 2021-2030 hefur átt sér stað fyrir tiltekin aðildarríki (sbr. viðauka II við reglugerð (ESB) 2018/842), þar sem ríkin geta nýtt ETS losunarheimildir skv. tilskipun 2003/87/EB, í því skyni að uppfylla skuldbindingar sínar samkvæmt reglugerðinni. Að auki hefur aðlögun átt sér stað fyrir losunarheimildir ársins 2021 fyrir aðildarríkin í viðauka IV í reglugerð (ESB) 2018/842.

Um 3. grein
3. gr. ákvörðunarinnar fjallar um það heildarmagn skv. 4. mgr. 4. gr. reglugerðar (ESB) 2018/842 sem taka má tillit til hjá viðkomandi aðildarríkjum við uppgjör skv. 9. gr. sömu reglugerðar til að nýta ETS losunarheimildir í því skyni að uppfylla skuldbindingar sínar, og er árleg losunarheimild viðeigandi ríkja aðlöguð að því leyti, sbr. framangreinda umfjöllun um 2. gr. ákvörðunar þessarar. Heildarfjöldi heimilda sem aðildarríkin í viðauka II við reglugerð (ESB) 2018/842 geta nýtt sér eru settar fram í viðauka III við ákvörðun þessa.